MANIFESTO DO DÍA INTERNACIONAL CONTRA A VIOLENCIA DE XÉNERO

MANIFESTO DO DÍA INTERNACIONAL CONTRA A VIOLENCIA DE XÉNERO.

25 DE NOVEMBRO

O 25 de novembro reunímonos para conmemorar o “Día Internacional da eliminación da Violencia de Xénero”, este día non tiña que existir no calendario, pois o único que nos lembra é que no século XXI aínda están presentes actitudes e comportamentos que perpetúan as desigualdades entre mulleres e homes.

A nosa sociedade avanza notablemente en diferentes campos coma o científico ou o tecnolóxico, pero non consegue erradicar a estrutura e a forma de pensar que sustenta o machismo máis exacerbado transmitido de xeración en xeración, en diferentes culturas e por diferentes razas.

Este ano en España silenciáronse as voces de 39 mulleres, todas elas asasinadas a mans de homes con ideas sexistas e estereotipos de xénero equivocados, baseados en condutas de dominio e control sobre as mulleres.

Debemos ser capaces de recoñecer e loitar contra as actitudes violentas para aportar o noso grao de area cara a erradicación total da violencia de xénero. No noso día a día, non debemos consentir comportamentos cotiás que pretenden denigrar ou ridiculizar á muller. Non podemos esquecer que a violencia contra as mulleres non só se produce no ámbito da parella, a realidade é que no mundo as  mulleres son asasinadas polo mero feito de ser mulleres, son violadas, mutiladas, golpeadas ou vendidas.

Rotundamente manifestamos a nosa repulsa pública ante  calquera tipo de violencia e moi especialmente a infrinxida contra as mulleres.

Manifestamos o noso apoio a calquera iniciativa que colabore na eliminación dos obstáculos que nos impiden vivir en igualdade de dereitos,de oportunidades e de acceso aos recursos.

Nesta época de crise que vivimos, reclamamos o compromiso dos poderes públicos para evitar a perda de dereitos legais, económicos ou asistencias das mulleres vítimas de violencia de xénero, das súas fillas ou fillos ou das persoas delas dependentes.

Con este manifesto queremos solicitar a implicación de toda a cidadanía na loita contra a discriminación por razón de xénero, lembrando  que a violencia cara as mulleres representa a maior das desigualdades na nosa sociedade e polo tanto,  é a nosa responsabilidade  traballar para conseguir un futuro onde se considere que todas e todos somos persoas dignas e merecemos o mesmo trato e respecto, tanto no ámbito privado coma no ámbito público.